तीन दशकपछि नागढुंगा-मुग्लिङ सडकको स्तरोन्नति गरिँदै

पहिलो प्याकेजका रूपमा नागढुंगा–नौबिसे खण्ड छ, जसको दूरी १२.२६ किमि र ठेक्का रकम १ अर्ब ३० करोड ८४ लाख रुपैयाँ रहेको अधिकारीले बताए । यसको ठेक्का सम्झौता ०७८ चैत २९ मा भए पनि काम ०७९ जेठ २६ बाट सुरु भएको हो । निर्माणको काम ०८१ जेठ २७ भित्र सकिसक्नुपर्नेछ । यस खण्डको ठेक्का जाङ्सु–सगुन जेभीले लिएका हुन् । जाङ्सु चिनियाँ कम्पनी हो । दोस्रो प्याकेज भने नौबिसे–मलेखु खण्ड हो । यसको दूरी ४८.५ किमि छ । यसको संयुक्त सर्भेको काम ५० प्रतिशत सकिइसकेको र ल्याब स्थापना गर्ने काम भइरहेको अधिकारीको भनाइ छ । दोस्रो खण्डको ठेक्का रकम भने ५ अर्ब ३३ करोड १९ लाख रुपैयाँ छ । जेडआईसीजी–शर्मा–लामा जेभीले यस खण्डको ठेक्का लिएका छन् । जेडआईसीजी पनि चिनियाँ कम्पनी रहेको विभागले जनाएको छ । ०७९ वैशाख १४ मा ठेक्का सम्झौता भएको र कार्यादेश जेठ २६ मा दिइएको विभागले बताएको छ । सम्झौताअनुसार यसको काम तीन वर्षभित्र अर्थात् ०८२ जेठ २७ भित्र सकिसक्नुपर्नेछ ।

तेस्रो प्याकेज हो, मलेखु–मुग्लिङ खण्ड । यसको काम भने सुरु भएको छैन । यस खण्डमा ठेक्का मूल्यांकन भइरहेको विभागको भनाइ छ । ‘एक महिनाभित्र मोबिलाइज हुने गरी ठेक्का सम्झौता हुनेछ,’ अधिकारीले भने, ‘अहिले आर्थिक र प्राविधिक मूल्यांकन भइरहेको छ ।’ ठेक्का सम्झौता भएपछि लागतबारे भन्न सकिने उनले बताए । ३४.१४ किमि दूरीको यस खण्डको निर्माण अवधि तीन बर्ष हुनेछ । दुई लेनको सडक ४८ किमि, क्लाइम्बिङ लेन ३७.५ किमि र चार लेन सडक ९.४ किमिसहित मुग्लिङसम्म ९४.९ किमि सडक स्तरोन्नति गर्न लागिएको विभागले जानकारी दिएको छ । यस खण्डमा २१ वटा नयाँ पुल निर्माण गरिनेछ । अहिले भएका पुराना पुल दुई लेनका छन् । पुराना पुलकै छेउमा दुई लेनकै नयाँ पुल निर्माण गरिने बताइएको छ । ‘नयाँ पुल बनेपछि पुराना भत्काइने छैन, चलुन्जेल चलाइनेछ,’ अधिकारीले भने, ‘यसबाट साँघुरा पुलले गर्दा हुने ट्राफिक जाम कम हुनेछ ।’

दुई वर्ष अघिबाट यस सडकको ठेक्का तयारी थालिएको थियो । ‘सुरुमा पूर्ण रूपमा सडक बन्द गरेर काम गर्ने र सवारीसाधनका लागि वैकल्पिक मार्ग बनाई त्यतै डाइभर्ट गर्ने योजना थियो,’ अधिकारीले भने, ‘तर त्यो सम्भव भएन । अब सडक बन्द नगरी ट्राफिक व्यवस्थापन गरेर काम गर्छौं ।’ सबै सडक खण्ड एकैचोटि भत्काउन्नौं । ‘सुरुमा ‘स्ट्रक्चर’ हरू निर्माणको काम गरिने र अन्तिम समयमा मात्र सडक भत्काएर काम गरिनेछ,’ उनले भने, ‘केही समयभित्र तीन खण्डकै सडक हेर्ने गरी मलेखुमा योजना कार्यालय पनि स्थापना गर्छौं ।’