खजुरा प्रज्ञा प्रतिष्ठानको उपकुलपतिमा डा. भण्डारी

खजुरा ।बाँके जिल्लाको पहिलो प्रज्ञा प्रतिष्ठानको रुपमा परिचित ‘खजुरा प्रज्ञा प्रतिष्ठान’को उपकुलपतिमा डा.इन्द्रबहादुर भण्डारी नियुक्त भएका छन् । प्रतिष्ठानका कुलपति एवम् खजुरा गाउँपालिकाका अध्यक्ष डम्बर बहादुर विकले उपकुलपतिमा डा.भण्डारीलाई नियुक्त गरेका छ।
शनिबार खजुरामा ‘खजुरा प्रज्ञा प्रतिष्ठान‘को स्थापना दिवश तथा घोषणा समारोहमा कुलपति एवम् अध्यक्ष बिकले प्रतिष्ठानको घोषणा सार्वजनिक गर्दै प्रतिष्ठानका अन्य सदस्यको नाम पनि सार्वजनिक गर्नुभयाे ।
प्रतिष्ठानको सदस्यहरुमा मणिदेव अर्याल, माधव शर्मा, कल्पना पौडेल र गाउँपालिका लेखा अधिकृत प्रदीप सुनार रहेका छन् । त्यस्तै प्रतिष्ठानको सहकुलपतिमा खजुरा गाउँपालिका उपाध्यक्ष मञ्जु मल्ल रहेकी छन।
कार्यक्रममा कुलपति एवम् पालिका अध्यक्ष विकले खजुरा गाउँपालिकाद्वारा भाषा, साहित्य, कला र संस्कृतिको संरक्षण र उत्थानका लागि ‘खजुरा प्रज्ञा प्रतिष्ठान’को स्थापना गरिएको बताए । उनले भने, ‘पालिकामा रहेको कला, संस्कृति, भाषा, साहित्यको अध्ययन, अनुसन्धान, संरक्षण, प्रवन्धन जस्ता कार्यक्रमहरु प्रतिष्ठानले संचालन गर्नेछ । खजुरामा रहेका साहित्यिक कृतिहरु प्रकाशन जस्ता कामहरु प्रतिष्ठानले गर्नेछ ।’
त्यस्तै कार्यक्रममा प्रतिष्ठानका उपकुलपति डा.भण्डारीले खजुरा प्रज्ञा प्रतिष्ठानले प्रज्ञा परिषद् र प्रज्ञा सभा गरी दुई विधामा काम गर्ने बताए । उनले प्रज्ञा परिषदमा ५ जना र प्रज्ञा सभामा १५ जना रहने बताए ।
उनले समाज विकासका लागि सांस्कृतिक क्रान्ति आवश्यक रहेकाले यस क्षेत्रमा खजुरा प्रज्ञा प्रतिष्ठानले विशेष भूमिका खेल्ने बताए ।
कार्यक्रममा पालिका उपाध्यक्ष एवम् सह-उपकुलपति मल्लले प्रज्ञा प्रतिष्ठानको माध्यामबाट पालिकामा रहेका सबै संस्कृतिको जगेर्ना गर्ने कामलाई प्राथमिकता दिन सकिने बताइन् ।